قلت له : لا لا انا اختلف معك يا أستاذ ( صالح) لأن التوجية والإرشاد هو الطريقة المثلى للتعامل مع الطالب وليس الضرب والعنف .. يمكن تكون الوزارة غلطت انها نشرت خبر منع الضرب في الجرايد و حسست الطلاب انها في صفهم ضد المدرس .. لذلك انا اشوف المفروض على الوزارة انها راسله القرار كتعميم داخلي لمدراء المدارس وفي كل الحالتين القرار بيوصل للمدرس صاحب الشأن <<< تصفيق حار لهالمدرس المثالي تكفون !!

أشار (صالح) بإصبعه على إحدى الزوايا المظلمة قائلاً: شايف المدرس اللي ينتف في شعره و يكلم نفسه هناك !! .. نظرت إلى رجلاً مأساوي مطأطأ رأسه إلى الأرض فقلت بفضول: ايه وش فيه ؟ .. قال: هذا كان من أفضل المعلمين على دفعته .. متمكن من المادة و يشرح بذمه وطبعاً المسؤولين ساحبين عليه وجاحدينه حتى كلمة شكر ما عطوه .. وفي يوم من الأيام تبلى عليه طالب حاقد كان راسب عنده واشتكاه بتهمة التحرش الجنسي .. بعدها عينك ما تشوف الا المسؤولين والمشرفين التربويين جايين ركض من الوزارة وانواع التحقيق والإستقعاد اللين صدر قرار بفصله ولولا الله ثم الطالب اللي رحمه واعترف بالحقيقة والا كان هالمسكين يبيع مساويك عند بوابة الوزارة !!

ترررررررخخخخسس <<< اي صح نسيت اقولكم ان الجرس مكسور !!

اوه رن الجرس.. عن اذنك يا استاذ (صالح) عندي إشراف فسحة !! .. ذهبت إلى المقصف شغوفاً بلقاء الطلاب ومتحمساً لتنظيمهم متجاهلاً ما سمعته ورأيته !!

وصلت للمقصف و أشوف طلاب المدرسة كلهم متكدسين على فتحة وحده وانواع الطقاق والمدافف !! .. حاولت اسيطر عليهم ما قدرت .. صارخت بأعلى صوتي وبرضو ما حولك أحد .. وفجأه جت على بالي فكرة تربوية جهنمية بعد ما لفت نظري طالب طوووويل القامة مفتول العضلات سوداوي البشرة شاحب الوجه هادي الطبع يدعى ( بلال) وهو يخترق الصفوف والطوابير بكل تهميش للأخرين <<< والله يا هو طوويل لدرجة انه حاط لمبة ناطحات السحاب الحمرا على جبهته منعاً لتشميع الطائرات فيه !! ..

تقدمت للزحمة واخترقت براثنها اللييين وقفت قدام ( بلال) وانا رافع راسي مية سنتيمتر عامودي واقول له: باين عليك أعقلهم وأشطرهم لذلك انا قررت أعينك ' نظام' تشرف معنا على الطلاب في الفسحة والمصلى وطبعاً ما راح نقصر معك بالمعاملة و الدرجات !! .. نزّل (بلال) راسه ميتين سنتيمتر أفقي وناظرني بنص عين ثمن دعس على وجهي وكمل طريقه ولا كأن فيه مواطن شريف واقف قدامه!! .. بعدها توالت دعسات الطلاب على وجهي اللييين توسمت أرقام مقاسات نعالهم عليه ..

طلعت من الزحمة زحفاً بعد جهداً جهيد ثمن وقفت وانا انفض الغبار عن وجهي .. فجأه حسيت بغصه و اتفل تفله مريرة طلع معها زبيرية واحد من الطلاب ناشبه في حلقي !! ..

لبست شماغي ويجي عندي البثر (جويعد) قائلاً بحماس: استاذ شف فيه شيب في شعر خشمك !! .. قلت بذهانه: علينا يا (جويعد) التسذوب.. لا تتعب نفسك منيب شايف شي!! .. قال: اصلن وشلون تشوف اللي داخل خشمك يالغبي !! .. ويمحطني بطراااق على خشمي للمره الثانية وهو يردد ضاحكاً: لعبت عليك لعبت عليك !! ..

شلت شماغي من الأرض ونظارتي اللي نشبت بين حدايد المقصف ومسحت الدم من خشمي ثمن رجعت لغرفة المدرسين متغلق وضايقن صدري.. توني بجلس الا ويدخل علي المدير: استاذ شطيط عندك حصة إنتظار في فصل 3/3 !! <<< هالحين انا ما صدقت اطلع من هالفصل وافتك من غثاثة ( علص) .. ارجع له وحصة إنتظار بعد !!!

اخذت شنطتي بقوم .. فجأه لمحت ورقة على ظهر المدير وهو طالع مكتوب عليها ( حمار للتقبيل ) .. قلت: يا ابو تركي فيه ورقة وراك مكتوب عليها حـ.. !! .. قاطعني بربكة: ايييه ذا العيال الله يصلحهم ما ودهم يتركون عادة نسيان أوراقهم معي

دخلت لفصل 3/3 و تفاجأت بحادثة لم يسبق لها مثيل في الميدان التعليمي!! .. شفت الطلاب يعمّرون حشيش ويشربون عيني عينك !! .. يشربون حشيش في الفصل !! .. حشيش يا جماعة الخير !! ..

ما قدرت امسك نفسي من العصبية وانفجر عليهم غاضباً: لو سمحتم ممنوع التدخين !! <<< بالله عليك !! ورا ما توزع عليهم منشورات توعويه عن التدخين وتغني لهم' سلامتك سلامتك نود لك سلامتك' بعد ..

الجدير بالذكر .. ان الطلاب فقدوا من الشرب و تمسك معهم يسبحون في بحر ..اللي قاموا يوخرون الطاولات علشان يسبحون !! .. و اللي يطب صاروخ عالبلاط ويشمّع فيه وهو يحرك يديه ورجوله قائلاً: يمديكم عالسباحة !! .. وخويه وراه يلحقه وهو يزحف: عوووو جاك سمك القرش!! .. واللي جالس على الأطراف مسوي بينقذ خويه من القرش وماد له طرف شماغه وهو يقول: اسحب اسحب!! .. واللي يمشي وراهم وهو يقول: وخرر انت وياه عن السفينة !! .. ما امداه يقول 'سفينة' الا ويطمر عليهم طالب من فوق الطاولة وهو يقول: تششششش ( يعني اني موج )
بعدها قام طالب اسمه ( صنيتان) يلاحقهم وهو يصارخ : طوووط طوووط خفر السواحل وصل .. وقف على جنب انت واياه !!.. جلس ( صنيتان) يحوس ثمن طلع برا الفصل ويشطف غرفة المدير وهو يردد: طووط طووط !!.. كمل طريقه وطلع من المدرسة وهو ما زال يردد: طووط طووط !! .. ومن بعدها ما عاد رجع !!

ناظرت للزاوية وأشوف ( جويعد ) جالس يدف الجدار .. وخويه جنبه يسأله: وش فيك ؟ .. قال: ببعد الجدار ما ابغاه جنبي!! ... قال: اجل دفـّه بعيد لا يطيح علي!! ..تحمدت ربي على نعمة العقل والتفت للجهة الثانية وأشوف ( علص) واقف قدام المكيف يناظره بعصبية وهو يقول: لا تنفخ !! .. وجنبه ( بلال ) الطويل ماسك له زاوية و جالس بكل هدوء وسكينة يقرا كتاب ( لا تحزن ) للشيخ عايض القرني : !!

جاني ( علص) وهو يشفط الزقارة بعمق وينفث في وجهي قائلاً: خذ اشرب؟ .. قلت: لا معليش انا ما اشرب !! .. ما وعيت الا وهو قاضبني من رقبتي وينشّبني في السبورة: اشرب لا افقـّع وجهك يا حمار !! .. قلت بخوف: سم طال عمرك !! <<< لا تشرهون على سلبيتي لأن الوزارة فارضتها على المدرس بموجب قرارها السامي رقم 3602/31 بتاريخ 13/9/1417: ' يمنع منعاً باتاً على المعلم حمل العصا أو ضرب الطالب مالم يبطحه أرضاً '

راعيت رزقي وأكلت تبن بموجب القرار السامي المذكور أعلاه .. وأخذت الزقارة وشربت بالإكراه .. عقبها بديت أفصل وصرت اشوف بحر قدامي وسفينة وسمك قرش وكل الخرابيط اللي فوق صارت واقعية !! .. أخذت الزقاره و أشفط شفطتين و ثلاث شفطات واربع فشطااات وخمس طفشااات وست شطفااات اللييين تمكن مني مفعول الحشيش و حسيت بشد عضلي في مخي وبديت اعيش دور البحر من الفقده... بعدها فصخت كل ملابسي ما عدا صروال السنّه وأرقى على الطاولة وأنا أهز خصري بكل خلاعه يعني اني أحد حسناوات شاطىء ميامي !! .. الطلاب قاموا يصفقون لي ويطبّلون عالطاولات وانا اللي اتحمس وأردح رقص بصروال السنه واسترسل بالغناء مغرداً: ماشربش الشاي اشرب ازوزا انا ... سو يا سو حبيبي حابسو .. بوس الواوا خلي الواوا بح .. فرشي التراب يضمني وهو غطائي !! <<< خروج عن النص !!

دخل علي استاذ ( صالح) ويجرّني من اذني برا الفصل قبل يصير ما لا تحمد عقباه !! .. ركبت معه في السيارة وانا أغني: أمه نعيمة نعمين خلي عليوه يكلمني!! .. غثيته بهالأغنية طول الطريق الليين وصلنا لبيته وانا مازلت مستمر في التغريد!! .. دخلنا البيت واطيح في الصالة من الدوخه!!

قمت من بكره الصبح اتلفت يمين يسار احاول اتذكر وش صار امس .. وش اللي جابني هنا .. وما لقيت جواب!! .. طلع استاذ (صالح) من غرفته وشرح لي كل اللي صار !! ..

استحقرت نفسي بعد اللي سمعته .. ولكن كالعادة تغاضيت عن الأمر ثمن رحت للمغسلة اغسل وجهي استعداداً للدوام !! .. ناظرت في المراية وبديت اتأمل في شخصيتي المسالمة !! .. فجأة اقشعرت المرايه و طلع لي فيها شخصيتي العنفوانية تقول لي : إلى متى بتصير ذرووق و جبان .. إلى متى بتصير زلااابة يا زلاااابة!! ..قاطعتها هائجاً: لااا انا منيب زلابة !! ..

أخذت شخصيتي العنفوانية تردد: يا زلابة يا زلابة!! .. فأثارت جنوني وخرجت من بيت الأستاذ (صالح) أركض غاضباً من تلك الكلمات القاسيه و أنا أصرخ قائلاً: انا منيب زلابه .. انا قوووي .. أنا بات مان .. انا حليب السعوديه <<< لا عاد تمدح نفسك تكفى !!

وصلت للمدرسة ودخلت الحصة الأولى بنفسيه منهاااره .. أول ما دخلت لقيت (علص) والطلاب يناظروني بنظرات مكر ودهاء ذكّرتني بشرفي المهدور أمس !!

فتحت الكتاب بشرح الدرس الاول .. ويقاطعني (علص): كيف صروال السنّه ابو نغيمش ؟ .. بعدها قام يتطنز علي ويرقى فوق الطاولة ويرقص وهو يغني بسخرية: ما اشربش الشاي اشرب ازوزا انا !! .. والطلاب يناظرون فيني ويضحكون ضحكات ماكره حطمت نفسيتي وخلتني البس نظارة شمسية علشان اخفي دموعي الغرّاء !! .. سكت (علص) ثمن قال: الله يهديك يا ابو نغيمش .. شاري نظارة شمسية بعد .. كان ركّبت ستاير لنظاراتك الطبية اوفر لك خخخخخخخ!!

بعدها همست على مسامعي شخصيتي العنفوانية: يذب عليك وتسكت له يا زلابة .. وخرر الله يلعن اللي مقضبك الطاره !! .. فجأه شعرت بشخصيتي العنفوانية تتغلغل في جسدي وتركل براءتي وطيبتي خارجاً !! ..

استفحل جسمي واستنشطت عضلاتي وقلبت عيوني حمر!! .. رميت النظارة والشنطة وفتحت الياقة و رفعت كمومي بكل سربته .. ثمن اتجهت لـ ( علص) بجبروت لا مثيل له !! .. فجأه اعترض طريقي ( جويعد ) : استاذ فيه شيب في شعر خشمك !! .. عطيته نظرة حارقة وامحط خشمه بأقرب كرسي ثمن رفعت رقبته وأشنقه بسلك المكيف !!

دب الذعر والخوف في صفوف الفصل وانا اللي أجرّ (علص) من أذنه لمقدمة الفصل و أفتح فمه قدام الطلاب وأأشر على سنونه قائلاً: وش ذا السوس يا قذر .. كل هذا سوس .. يعنبوك تاكل زفلت انت .. وبعدين وش ذا الثوب الوصخ .. يعنبو بليسك ثوبك ذا لو اصفطه انكسر من الوصاخة يا وووصخ .. رح اغسله بفازلين ولا عاد تجي للمدرسة الا وانت نظيف يا شرذمة !!

جلست اذب على ( علص) الليين طاحت حنوك الطلاب من الضحك عليه!! .. وبعد ما بردت حرتي بالذب عليه , مسكته تصفيييق الليين قال ربي الله .. عقبها قاموا علي ست طلاب بيفزعون لخويهم وانا اللي استسعر عليهم تصفييق وتلكيييج خليتهم عظة وعبرة للمدرسة كلها <<< ست طلاب يا ميتاب !! ..

ومن يومها قررت اني اضرب بقرارات الوزارة عرض الحائط .. وصرت ما ادخل لأي فصل الا بعجرة امغط بها المشاغبين ( المئيوس منهم تربوياً ) اللييين انضبطوا الطلاب و رجعت المسيرة التعليمية للمدرسة وهيبة أعضاء هيئة التدريس واحترامهم .. وصارت المدرسة تشارك في مسابقات الإلقاء والمسرح و دوري مبارايات الكورة مع المدارس الثانية لدرجة انها أخذت المركز الثاني على مستوى جنوب الرياض ..

وبعدها بيومين .. استدعتني الوزارة للتحقيق وأحالتني على لجنة قضايا المعلمين بعد ما ثبت اني احمل العصا واضرب الطلاب.. وبعد إجراءات مريرة طبقوا بحقي عقوبات نظام تأديب الموظفين !! ..

أثناء ذلك همست على مسامعي شخصيتي العنفوانية: يا رجال كل تبن انت وهالوزارة .. والله انت الكسبان على هالعقوبة .. اجل لا شكر ولا حرص ..و صاجينا بالبيئة المدرسية ونص المدارس عندنا فصولها مطبخ ومقلط حريم وغرفة نوم حتى الحوش قالبينه ملعب بدون ما يبعدون الدينمو اللي ما فيه رجل طالب ما شمعّت فيه ..

رحت لمكتب مدير التربية و التعليم وكتبت استقالتي له ثمن قضبت الباب .. فجأه استوقفتني عنفوانيتي قائله: لحظة لحظة نسيت شي مهم !! .. رجعت لمكتب المدير وصفقت جبهته بالدباسه ثمن طلعت راجع لقريتي العزيزة!!

مسكت طريق صلبوخ عائداً لقريتي .. شوي الا واشوف واحد يمشي ويردد ' طووط طوووط' .. ويوم دققت فيه الا وهو ( صنيتان) اللي طلع من الفصل وما عاد رجع !!

كملت طريقي .. وأشوف باصات نقل المعلمات متقلّبه عالطريق وانواع الإصابات والضحايا المتوالية واليومية!! .. تبادلت ضحكات السخرية مع شخصيتي العنفوانية على هالوزارة اللي فالحه تراقب دفاتر التحضير وكشوف غياب المعلمين وتاركه أرواحهم تهدر يومياً !! ..

ختاماً .. وصلت لمزرعتنا.. ومن يومها وانا اسقي الزرع والقـّح النخل واقابل هالعنز والخرفان بكرامة محفوظة ابرك لي من مقابل طلاب بدون كرامة!!

برايفت حبيباتي المعلمات :