يا ابو هلا طير الهوى خبث البال=الطير نزر والحبارى قليله
يالله ياللي طالبه ما بعد فال=ياللي من الضيقات ينجي دخيله
أفرج لمن قلبه غدا فيه ولوال=والنوم ماجا عينه الا قليله
لا من ذكرت رموس عصر لنا زال=وشف الفياض وفقد عز القبيله
يا زين شدتهم إلى زوع المال=يتلون براق تلالا مخيله
يتلون براق سمر عقب الامحال=تلقى التريبي فايظ غب سيله
عـجـمـان لا ركـبـوا على كل شملال=يفرح بهم راعـــى الـنـياق الهزيله
يسقى خسيفا والثمان أرضهن سال=مرتع معطرة السيوف الصقيله
من جو ساقان إلى السيف همال=وينوش حسنا والرديفة هميله
فإن قادنا من يمه القفر خيال=يصبح شديد البدو عجل رحيله
قاد السلف واستجنبوا كل مشوال=والعصر يا ما احلا تخبيط نزيله
فإن شرف البادي على روس الاقذال=والمال كثر الزوال محمي جفيله
وتكافخت بطبولها شهب الاذيال=ومن ضيع المفتاح واعزتي له
وركبوا على طوعاتهم كل عيال=كل أبلج يحري بكسب النفيله
وتغازلوا المفزاع ذربين الأفعال=من قبل سبق غارته تنثني له
يبغون طوعة روسهن قبل الادمال=وتغانموا خلف كشير هجيله
وحال الكمي من دون عطرات الاجهال=وموا ولحقوا مقحمين الدبيله
واللي تشنوا كلهم بلبس الشال=ومن صنع داود دروع ثقيله
لزم عليهم علة عقب الانهال=ومن غارته لزم يضيع دليله
والدم من قحص الرمك يثعا اثعال=يزعج على أوراك السبايا وشيله
هذيك راعيها من المعرقة مال=وهذي شكلها مطرق ما تشيله
مع وقع كل مقرنس قد له افعال=وفروخ صادن الحباري فصيله
يا مـا حلا الفنجـال مـع سيحة البـال=فــي مـجلسن ما فيــه نفسه ثقيـله
هـذا ولــد عـم وهـــذا ولـد خال=وهذا رفيق مـا لـقـيـنـا مـثـيلـه
يـا لـيـت رجـال يـبـدل بـرجــال=ويا ليت فـي بــدلا الـرياجيل حليه
ولـيـا ركبنا فوق عـجــلات الازوال=وبايمنـا حـدب السيوف الصقيلــــه
ومـا حـن نحسب لا شتـبك عج واكتال=وتـرك صـبى يفتنع بالفــشيــلــه
وصلاة ربي عـد مـا زايـــــل زال=على نبى الحـق راعـى الفــضيــله